«Bizge aldaǵy ýaqytta beıbitshilikti jaqtaıtyn saıasatymyz ben halyqtyń ál-aýqatyn jaqsartý baǵytyndaǵy ıgi áreketterimizdi jalǵastyra berý kerek. Solaı istelip jatyr. Kópshilik halyqtyń qoldaýymen resmı joǵary bılik tizginin qolyna alǵan Memleket basshysy Qasym-Jomart Kemeluly Toqaev búginde strategııalyq baǵdarlamalardy laıyqty jalǵastyryp, eldi tıimdi basqaryp keledi», dedi Tuńǵysh Prezıdent.
Sondaı-aq, ol qazaq tarıhyndaǵy ókinishti sátterdiń bári el birligine syzat túsken kezde oryn alǵanyn eske saldy.
«Tarıhtan bilesizder. Qazaq qosylǵan kezde jeńbegen jaýy bolǵan joq. Qazaq kishkene ydyraǵan kezde kim bolsa, sol kelip talap ketken. Sony ózimiz de, jastarymyz da eshqashan umytpaýy kerek. Sondyqtan Prezıdentimizdi qoldap, bastamalarynyń barlyǵyna jumys istep, bir adamdaı bolsa, bir qoldan jeń shyǵarsaq, bir ıyqtan bas shyǵarsaq, bolashaqtaǵy tabystarymyz mol bolady», dedi Nursultan Nazarbaev.
